सांवतवाडी नगरपरिषदेच्या विशेष सभेत तीन महत्त्वाचे ठराव मंजूर
Follow us on
सांवतवाडी: नगरपरिषदेची विशेष सभा नगराध्यक्षा श्रद्धा जे. भोसले यांच्या अध्यक्षतेखाली लोकमान्य टिळक सभागृहात संपन्न झाली. या बैठकीत शहराच्या दृष्टीने अत्यंत महत्त्वाच्या तीन विषयांवर चर्चा होऊन ते सर्वानुमते मंजूर करण्यात आले. या सभेला उपनगराध्यक्ष ॲड. अनिल निरवडेकर यांच्यासह विविध समितींचे सभापती व नगरसेवक मोठ्या संख्येने उपस्थित होते.
सभेमध्ये प्रामुख्याने केंद्र सरकारच्या पर्यावरण, वन आणि हवामान बदल मंत्रालयाने पश्चिम घाट इकोलॉजिकल सेन्सिटिव्ह क्षेत्राबाबत जाहीर केलेल्या मसुदा अधिसूचनेचा विचार करण्यात आला. या अधिसूचनेचा सांवतवाडी शहर व परिसरातील बांधकामावर तसेच हॉटेल व्यवसायावर गंभीर परिणाम होण्याची शक्यता वर्तवण्यात आली. ही बाब लक्षात घेता, शहराला इको-सेन्सिटिव्ह झोनमधून पूर्णपणे वगळण्यात यावे, असा ठराव सभागृहात मांडण्यात आला व तो मंजूर झाला.
या विषयावर चर्चा करताना नगरसेवक ॲड. निता कवितकर-सावंत, आनंद नेवगी, अजय गोंदावळे आणि सिद्धार्थ भांबुरे यांनी आपली मते व्यक्त केली. शहरावर होणारे संभाव्य परिणाम टाळण्यासाठी नगरपरिषदेने पुढाकार घ्यावा, अशी सूचना सदस्यांनी केली. नगराध्यक्षांनी यावर स्पष्ट केले की, या संदर्भात शहरात व्यापक जनजागृती मोहीम राबवण्यात येईल, जेणेकरून प्रत्येक प्रभागातील नागरिक आपापल्या हरकती अधिकृतपणे नोंदवू शकतील.
तसेच, सांवतवाडीत केंद्र सरकारच्या अखिल भारतीय आयुर्वेद संस्थान, गोवा यांच्यामार्फत आयुर्वेद बाह्यरुग्ण विभाग (ओपीडी) सुरू करण्याबाबतच्या सामंजस्य कराराला देखील या सभेत मंजुरी देण्यात आली. या ओपीडीसाठी लागणारी जागा व सोयीसुविधा उपलब्ध करून देण्याचा निर्णय परिषदेने घेतला आहे. विशेष म्हणजे, या ओपीडीमध्ये नागरिकांकडून कोणत्याही प्रकारचे शुल्क आकारले जाऊ नये आणि त्यांना मोफत आरोग्य सेवा मिळावी, असा महत्त्वपूर्ण अट या करारात घालण्यात आली आहे.
या व्यतिरिक्त सांवतवाडीची ओळख असलेल्या पारंपारिक लाकडी खेळणी, लाककाम आणि गंजिफा कला प्रकारांना युनेस्कोकडून जागतिक सांस्कृतिक वारसा म्हणून मान्यता मिळावी, यासाठी विशेष प्रस्ताव तयार करून पाठवण्याचा निर्णय घेण्यात आला आहे. बैठकीच्या शेवटी, शहरवासीयांना मोफत ओपीडी सुविधा मिळावी यासाठी सातत्याने पाठपुरावा करणारे नगरसेवक देव्या सूर्याजी यांच्या प्रयत्नांचे इतर नगरसेवकांनी कौतुक केले. या बैठकीला अनेक माजी पदाधिकारी व नगरसेवक उपस्थित होते.
