केंद्र शासनाकडून अतिरिक्त दुष्काळ मदत निधी मिळवण्यासाठी सर्व बाधित शेतकऱ्यांना ‘ॲग्रीस्टॅक फार्मर आयडी’ (AgriStack Farmer ID) नोंदणी करणे आता बंधनकारक करण्यात आले आहे.
Follow us on
सावंतवाडी येथे मुख्य सचिवांच्या अध्यक्षतेखाली पार पडलेल्या दुष्काळ परिस्थितीच्या बैठकीत मदत व पुनर्वसन सचिवांनी स्पष्ट केले आहे की, केंद्र सरकारकडून मिळणारा अतिरिक्त मदत निधी प्राप्त करण्यासाठी ॲग्रीस्टॅक फार्मर आयडीची नोंदणी आवश्यक आहे. सध्याच्या स्थितीनुसार सिंधुदुर्ग जिल्ह्यात केवळ ५५ टक्के खातेदारांचीच ही नोंदणी पूर्ण झालेली दिसून येत आहे.
जिल्ह्यात सध्या उद्भवलेल्या दुष्काळी परिस्थितीमुळे अनेक शेतकऱ्यांच्या पिकांचे मोठे नुकसान झाले असून प्रशासनाकडून त्यांचे पंचनामे करण्यात आले आहेत. परंतु, ज्या शेतकऱ्यांचे पंचनामे झाले आहेत, त्यांना नुकसान भरपाईची रक्कम थेट मिळण्यासाठी ही फार्मर आयडी नोंदणी पूर्ण असणे प्रशासनाने अत्यंत अनिवार्य केले आहे.
या पार्श्वभूमीवर सावंतवाडी तालुक्यातील महसूल व प्रशासकीय यंत्रणेला सर्व बाधित शेतकऱ्यांची नोंदणी वेळेत पूर्ण करून घेण्याचे स्पष्ट निर्देश देण्यात आले आहेत. तालुक्यातील एकाही पात्र शेतकऱ्याची भरपाई या नोंदणीअभावी प्रलंबित राहू नये, यासाठी सर्व तालुक्यांमध्ये या कामाला गती देण्याच्या सूचना देण्यात आल्या आहेत.
सावंतवाडी तहसीलदार कार्यालयाकडून तालुक्यातील सर्व शेतकरी बांधवांना आवाहन करण्यात आले आहे की, त्यांनी या सूचनेची गंभीर दखल घ्यावी. नुकसान भरपाई मिळण्यात कोणतीही अडचण येऊ नये म्हणून सर्व शेतकऱ्यांनी आपल्या नजीकच्या ‘सीएससी’ (CSC – कॉमन सर्व्हिस सेंटर) म्हणजेच नागरी सुविधा केंद्रावर जाऊन ही प्रक्रिया पूर्ण करावी.
नोंदणीसाठी शेतकऱ्यांनी सोबत आपले आधार कार्ड, ७/१२ उतारा, आधारशी संलग्न असलेला मोबाईल क्रमांक, बँक पासबुक आणि अलीकडील छायाचित्र ही आवश्यक कागदपत्रे सोबत ठेवावीत. आपली नोंदणी प्रलंबित न ठेवता तातडीने पूर्ण करून सहकार्य करावे, असे आवाहन प्रशासनाकडून करण्यात आले आहे.
