मुंबई: राज्यातील मच्छिमारांसाठी एक महत्त्वाची बातमी समोर आली असून, १ ऑगस्ट २०२६ पासून विशेष आर्थिक क्षेत्रात (Exclusive Economic Zone – EEZ) म्हणजेच किनाऱ्यापासून १२ सागरी माइलापुढील खोल समुद्रात मासेमारी करण्यास परवानगी देण्यात आली आहे. मात्र, महाराष्ट्राच्या प्रादेशिक जलक्षेत्रात (किनाऱ्यापासून १२ सागरी माइलापर्यंत) १५ ऑगस्ट २०२६ पर्यंत मासेमारीवरील बंदी कायम राहणार असल्याची माहिती मत्स्यव्यवसाय विभागाने दिली आहे.
पावसाळा हा अधिकांश सागरी माशांच्या प्रजननाचा काळ असल्याने मत्स्यसंपत्तीचे संवर्धन आणि पुनरुत्पादन व्हावे, यासाठी दरवर्षी या कालावधीत मासेमारीवर बंदी घातली जाते. यंदा महाराष्ट्र शासनाने प्रादेशिक जलक्षेत्रातील बंदीचा कालावधी १५ ऑगस्टपर्यंत, म्हणजेच एकूण ७६ दिवसांपर्यंत वाढवला आहे. त्यामुळे किनाऱ्यापासून १२ सागरी माइलापर्यंतच्या समुद्रात या कालावधीत मासेमारी करण्यास परवानगी नाही. त, केंद्र शासनाने पश्चिम किनारपट्टीवरील विशेष आर्थिक क्षेत्रात (EEZ) ३१ जुलैपर्यंत म्हणजेच ६१ दिवसांची बंदी लागू केली होती, त्यामुळे १ ऑगस्टपासून EEZ क्षेत्रात मासेमारी पुन्हा सुरू होणार आहे.
मत्स्यव्यवसाय विभागाने मच्छिमारांना खोल समुद्रात मासेमारी करताना या मर्यादांचे काटेकोर पालन करण्याचे आणि सर्व नियमांचे पालन करण्याचे आवाहन केले आहे. तसेच, बंदीच्या कालावधीत महाराष्ट्राच्या प्रादेशिक जलक्षेत्रात बेकायदेशीररीत्या मासेमारी करणाऱ्यांविरुद्ध महाराष्ट्र सागरी मत्स्यव्यवसाय नियमन अधिनियम अंतर्गत कठोर कारवाई करण्यात येणार असल्याचा इशाराही विभागाने दिला आहे.
