दिवाळी आणि पूजेच्या उत्सवादरम्यान प्रवाशांची होणारी अतिरिक्त गर्दी सुरळीतपणे नियंञित करण्यासाठी कोकण रेल्वे प्रशासनाने तिरुअनंतपुरम सेंट्रल ते मदार जंक्शन या मार्गावर साप्ताहिक विशेष रेल्वे गाड्या सुरू करण्याची घोषणा केली आहे. २१ ऑक्टोबर ते २८ नोव्हेंबर या कालावधीत ही विशेष सेवा उपलब्ध राहणार असून या ट्रेनमुळे कोकणातील सावंतवाडी रोडसह विविध महत्त्वाच्या स्थानकांतील प्रवाशांना मोठा दिलासा मिळणार आहे.
तिरुअनंतपुरम सेंट्रलवरून सुटणारी गाडी क्रमांक ०६०१३ ही साप्ताहिक विशेष ट्रेन २१ ऑक्टोबर, २८ ऑक्टोबर, ४ नोव्हेंबर, ११ नोव्हेंबर, १८ नोव्हेंबर आणि २५ नोव्हेंबर रोजी बुधवारी सकाळी ७:४५ वाजता प्रवासासाठी रवाना होईल. ही रेल्वे आपल्या प्रवासाच्या तिसऱ्या दिवशी सकाळी ११:०० वाजता मदार जंक्शन येथे पोहोचेल.
परतीच्या प्रवासासाठी गाडी क्रमांक ०६०१४ ही मदार जंक्शन – तिरुअनंतपुरम सेंट्रल साप्ताहिक विशेष ट्रेन मदार येथून २४ ऑक्टोबर, ३१ ऑक्टोबर, ७ नोव्हेंबर, १४ नोव्हेंबर, २१ नोव्हेंबर आणि २८ नोव्हेंबर रोजी शनिवारी रात्री ९:४० वाजता सुटेल. ही गाडी आपल्या प्रवासाच्या चौथ्या दिवशी रात्री १२:४५ वाजता तिरुअनंतपुरम सेंट्रल येथे पोहोचणार आहे.
या विशेष ट्रेनला प्रवाशांच्या सोयीसाठी २० आधुनिक एलएचबी (LHB) डबे जोडण्यात आले आहेत. यामध्ये २ वातानुकूलित द्वितीय श्रेणी (2 Tier AC), १ वातानुकूलित तृतीय श्रेणी (3 Tier AC), ४ वातानुकूलित तृतीय श्रेणी इकॉनॉमी (3 Tier AC Economy), १३ स्लीपर श्रेणीचे डबे आणि २ जनरेटर कारचा समावेश आहे.
प्रवाशांच्या सोयीसाठी या ट्रेनला कोल्लम जंक्शन, कायनाकुलम, एर्नाकुलम, मडगाव, सावंतवाडी रोड, कणकवली, रत्नागिरी, संगमेश्वर रोड, चिपळूण, खेड, माणगाव, रोहा, पनवेल, वसई रोड, वापी, सुरत, वडोदरा, रतलाम, चित्तौडगड आणि अजमेर अशा अनेक महत्त्वाच्या स्थानकांवर थांबे देण्यात आले आहेत. कोकण रेल्वे प्रशासनाने प्रवाशांना या विशेष सेवेचा लाभ घेण्याचे आवाहन केले असून अधिकृत संकेतस्थळावर सविस्तर वेळापत्रक उपलब्ध करून दिले आहे.
