दोडामार्ग तालुक्यातील हत्तींच्या त्रासातून स्थानिक नागरिकांना व शेतकऱ्यांना दिलासा देण्यासाठी वनविभाग, लोकप्रतिनिधी आणि आंदोलकांची संयुक्त बैठक पार पडली. या बैठकीत उपवनसंरक्षक मिलिंद शर्मा यांनी हत्तींचा मार्ग रोखण्यासाठी रेल्वे रूळांचे मजबूत बॅरिगेड्स उभारण्याचे नियोजन आखले असल्याचे स्पष्ट केले. आमदार दीपक केसरकर यांच्या उपस्थितीत झालेल्या या चर्चेत वन्य प्राण्यांमुळे होणाऱ्या नुकसानीवर ठोस उपाययोजना करण्याबाबत सविस्तर विचारविनिमय करण्यात आला.
या महत्त्वाकांक्षी संरक्षण प्रकल्पासाठी सुमारे ४८ कोटी रुपयांच्या निधीची आवश्यकता असून, याबाबतचा प्रस्ताव वनमंत्र्यांसोबत होणाऱ्या बैठकीत मांडून त्याला अंतिम मंजुरी मिळवून दिली जाईल, अशी ग्वाही आमदार केसरकर यांनी दिली. विशेषतः तिलारीच्या वरच्या भागातून गावात येणारे हत्तींचे मार्ग रोखण्यासाठी हे रेल्वे रूळांचे बॅरिगेड्स अत्यंत प्रभावी ठरणार असल्याचे वनविभागाचे म्हणणे आहे.
दुसरीकडे, ओंकार हत्तीला पकडण्याच्या मोहिमेला प्राणिमित्रांनी न्यायालयात आव्हान दिल्याने या मोहिमेला स्थगिती मिळाली आहे. ही स्थगिती उठवण्यासाठी न्यायालयात आवश्यक ती कायदेशीर याचिका दाखल करावी लागणार असून, त्या न्यायालयीन प्रक्रियेचा सर्व खर्च स्वतः उचलण्याचे आश्वासन आमदार केसरकर यांनी शेतकऱ्यांना दिले. तसेच, परजिल्ह्यातील स्वयंसेवी संस्थांना शेतकऱ्यांच्या प्रत्यक्ष समस्यांची कल्पना नसल्याने, गावागावात विशेष ग्रामसभा घेऊन न्यायालयात मांडण्यासाठी सक्षम ठराव संमत करण्याचे आवाहन त्यांनी केले.
स्थानिक ग्रामस्थांनी ऑक्टोबर २००२ पासून सिंधुदुर्गात हत्तींचे वास्तव्य असल्याचे सांगत हत्ती, गवे, माकड आणि शेकरू या वन्यजीवांमुळे शेती आणि बागायतींचे होणारे प्रचंड नुकसान मांडले. केवळ वरवरची आर्थिक नुकसानभरपाई न देता वन्य प्राण्यांचा कायमस्वरूपी बंदोबस्त करावा, सौरऊर्जा कुंपण उभारावे आणि वनराई बंधारे बांधून स्थानिकांना रोजगाराच्या संधी उपलब्ध करून द्याव्यात, अशी ठाम भूमिका उपस्थित शेतकऱ्यांनी घेतली.
या बैठकीस उपसभापती गणेशप्रसाद गवस, माजी सभापती नामदेव निंबाळकर, नगराध्यक्ष चेतन चव्हाण, उपवनसंरक्षक मिलिंद शर्मा, सहायक उपवनसंरक्षक वैभव बोराटे, ‘हत्ती हटवा मनुष्य वाचवा’ समितीचे प्रमुख गणपत दळवी यांच्यासह दोडामार्ग तालुका विकास मंडळाचे पदाधिकारी आणि विविध संघटनांचे प्रतिनिधी मोठ्या संख्येने उपस्थित होते. वनविभागाने आखलेल्या सर्व योजना कागदावर न राहता त्यांची तात्काळ व प्रभावी अंमलबजावणी व्हावी, अशी एकमुखी अपेक्षा सर्व ग्रामस्थांनी व्यक्त केली.
