पुणे, पिंपरी-चिंचवड आणि नाशिकमधील सर्वसामान्यांच्या खिशाला महागाईचा पुन्हा एकदा फटका बसला असून, महाराष्ट्र नॅचरल गॅस लिमिटेडने (MNGL) सीएनजी आणि घरगुती पीएनजीच्या दरामध्ये वाढ करण्याचा निर्णय घेतला आहे. गॅसच्या इनपुट खर्चात तसेच आयात केलेल्या एलएनजीच्या (LNG) किमतीत झालेली वाढ या दरवाढीमागील मुख्य कारण असल्याचे कंपनीकडून स्पष्ट करण्यात आले आहे. या नव्या बदलामुळे वाहनचालक आणि गृहिणींच्या मासिक बजेटवर अतिरिक्त आर्थिक भार पडणार आहे.
या दरवाढीनुसार सीएनजीच्या दरात प्रति किलो १.२५ रुपयांची वाढ करण्यात आली आहे, ज्यामुळे या तिन्ही जिल्ह्यांमध्ये सीएनजीचा नवीन दर आता प्रति किलो ९९.७५ रुपयांवर पोहोचला आहे. दुसरीकडे, घरगुती वापराच्या पाइप्ड नॅचरल गॅसच्या (PNG) किमतीत प्रति एससीएम (SCM) १.५० रुपयांची वाढ झाली असून, त्यामुळे पीएनजीचा नवीन दर ५१.७५ रुपये प्रति एससीएम इतका झाला आहे. हे नवीन दर १२ आणि १३ नोव्हेंबरच्या मध्यरात्रीपासून संपूर्ण भागात लागू झाले आहेत.
एकंदरीत जीवनावश्यक वस्तूंच्या वाढत्या किमतींमुळे आधीच त्रस्त झालेल्या नागरिकांना आता गॅस दरवाढीचा सामना करावा लागत आहे. दरम्यान, पेट्रोलच्या तुलनेत सीएनजी वापरल्यास अद्यापही ४५ टक्क्यांपर्यंत आणि डिझेलच्या तुलनेत २० टक्क्यांपेक्षा जास्त बचत होत असल्याचा दावा एमएनजीएल (MNGL) कंपनीने केला आहे. असे असले तरी, सातत्याने होणाऱ्या अशा दरवाढीमुळे सर्वसामान्य जनतेच्या खिशाला मोठी कात्री लागत असून नाराजी व्यक्त होत आहे.
