मुंबई, दि. (प्रतिनिधी) — छत्रपती शिवाजी महाराज टर्मिनस (सीएसएमटी) येथे सुरू असलेल्या पायाभूत सुविधा विकासकामांमुळे प्लॅटफॉर्म क्रमांक १६ आणि १७ हे १ फेब्रुवारीपासून पुढील ८५ दिवसांसाठी बंद ठेवण्यात आले आहेत. त्यामुळे २६ एप्रिलपर्यंत या दोन्ही प्लॅटफॉर्मवरून होणारी वाहतूक बंद राहणार आहे.
या कालावधीत कोकणवासियांची पसंती असलेली मडगाव–सीएसएमटी ‘तेजस एक्सप्रेस’ ही सीएसएमटीऐवजी दादर स्थानकावरच टर्मिनेट होईल. तसेच मंगळुरु–सीएसएमटी एक्सप्रेसचा प्रवास आता ठाणे स्थानकावरच संपणार आहे.
सीएसएमटी स्थानकाचा सुमारे २,४५० कोटी रुपये खर्चून जागतिक दर्जाचा पुनर्विकास करण्यात येत असून, या कामाची जबाबदारी अहलूवालिया कॉन्ट्रॅक्ट्स लिमिटेडकडे देण्यात आली आहे. या प्रकल्पात नवीन इमारतींचे बांधकाम, प्रवाशांसाठी अद्ययावत सुविधा, पार्सल सेवा तसेच हेरिटेज इमारतीचे जतन यांचा समावेश आहे. काम पूर्ण झाल्यानंतर प्रवाशांची गर्दी विभागली जाऊन प्रवास अधिक सुकर होईल, असा दावा रेल्वे प्रशासनाने केला आहे.
दरम्यान, विदर्भ, मराठवाडा आणि कोकणातून येणाऱ्या काही गाड्यांच्या वेळापत्रकात आणि टर्मिनसमध्ये बदल करण्यात आले आहेत. अमरावती–सीएसएमटी एक्सप्रेस, बल्लारशाह–सीएसएमटी नंदीग्राम एक्सप्रेस, हावडा मेल, भुवनेश्वर कोणार्क एक्सप्रेस, बिदर एक्सप्रेस आणि लातूर एक्सप्रेस या गाड्या आता सीएसएमटीऐवजी दादर स्थानकापर्यंतच धावतील.
खालील गाड्या त्यांच्या निर्धारित स्थानकापर्यंत (CSMT) न जाता दादर स्थानकावरच थांबतील:
१२११२ अमरावती-CSMT एक्सप्रेस
११००२ बल्लारशाह-CSMT नंदीग्राम एक्सप्रेस
१२८१० हावडा-CSMT एक्सप्रेस
११०२० भुवनेश्वर-CSMT कोणार्क एक्सप्रेस
२२१४४ बिदर-CSMT एक्सप्रेस / २२१०८ लातूर-CSMT एक्सप्रेस
२२१२० मडगाव-CSMT तेजस एक्सप्रेस
ठाणे स्थानकावर थांबणारी गाडी (Short Terminated at Thane)
१२१३४ मंगळुरू-CSMT एक्सप्रेस ही गाडी आता फक्त ठाणे स्थानकापर्यंतच धावेल.
