मुंबई: महाराष्ट्रातील सर्व परवानाधारक रिक्षा आणि टॅक्सी चालकांसाठी १ मे पासून मराठी भाषेचे ज्ञान अनिवार्य करण्याचा महत्त्वपूर्ण निर्णय परिवहन मंत्री प्रताप सरनाईक यांनी घेतला आहे. या निर्णयानुसार, ज्या चालकांना मराठी लिहिता, वाचता किंवा बोलता येणार नाही, त्यांचे परवाने रद्द करण्यात येतील, अशी कडक ताकीद देण्यात आली आहे. राज्य परिवहन विभागाच्या ५९ प्रादेशिक कार्यालयांच्या माध्यमातून या निर्णयाची प्रभावी अंमलबजावणी करण्यासाठी विशेष मोहीम राबवली जाणार आहे.
या निर्णयाला ९६ वर्षीय पद्मश्री पुरस्कार विजेते आणि ज्येष्ठ साहित्यिक मधू मंगेश कर्णिक यांनी पत्राद्वारे आपला पूर्ण पाठिंबा दर्शवला आहे. मंत्री प्रताप सरनाईक यांनी ट्विटरवर कर्णिक सरांच्या स्वाक्षरीतील पत्राची प्रत शेअर करत, हा आपल्यासाठी मोठा आशीर्वाद असल्याचे म्हटले आहे. कर्णिक यांनी या वयातही मराठी भाषा आणि संस्कृतीच्या रक्षणासाठी घेतलेल्या या भूमिकेचे सर्वत्र कौतुक होत आहे.
स्थानिक भाषेचा आदर राखला जावा आणि प्रवाशांशी संवाद साधताना भाषिक अडथळे येऊ नयेत, हा या निर्णयामागचा मुख्य उद्देश आहे. अनेक मराठी संघटनांनी या पावलाचे स्वागत केले असले, तरी काही अमराठी चालक संघटनांनी याला विरोध करत १ मे पासून संपाचा इशारा दिला आहे. मात्र, “महाराष्ट्रात व्यवसाय करायचा असेल तर स्थानिक भाषेचा सन्मान करावाच लागेल,” अशी ठाम भूमिका सरनाईक यांनी घेतली आहे. महाराष्ट्र दिनाच्या पार्श्वभूमीवर घेतलेला हा निर्णय राज्यातील भाषिक अस्मिता अधिक बळकट करणारा ठरेल, अशी चिन्हे दिसत आहेत.
