Follow us on 
सिंधुदुर्गनगरी: जिल्ह्यात वन्यजीव तस्करीचे जाळे पुन्हा एकदा उघडकीस आले असून स्थानिक गुन्हे अन्वेषण शाखेने (LCB) केलेल्या धडक कारवाईत तब्बल ९२ लाख रुपयांचा मुद्देमाल जप्त केला आहे. रानबांबुळी येथील अनावकरवाडी परिसरात पोलिसांनी सापळा रचून ही मोठी कारवाई केली.
दुर्मिळ खवले आणि सांबराची शिंगे जप्त
पोलिसांनी दिलेल्या माहितीनुसार, या कारवाईत दुर्मिळ खवले मांजराची (Pangolin) १.८०० किलो वजनाची खवले, सांबराची दोन शिंगे आणि दोन मोटारसायकली ताब्यात घेण्यात आल्या आहेत. जप्त करण्यात आलेल्या खवल्यांना आंतरराष्ट्रीय बाजारात मोठी मागणी असल्याचे सांगितले जाते. तसेच सांबराच्या शिंगांचाही अवैध व्यापार केला जात असल्याची माहिती समोर आली आहे.
चार आरोपींना अटक
या प्रकरणी पोलिसांनी खालील चौघांना ताब्यात घेतले आहे:
१. गणेश प्रदीप शिर्के (वय ३०, रा. पडवे, ता. कुडाळ)
२. विठोबा भगवान बावळेकर (वय ८२, रा. रानबांबुळी)
३. शंकर यशवंत तारापूरे (वय ३१, रा. पडवे)
४. कालिदास दत्तात्रय वारंग (वय ५५, रा. सुकळवड, ता. मालवण)
अशी झाली कारवाई
शुक्रवार, दिनांक २९ मे २०२६ रोजी सकाळी ११.४० वाजण्याच्या सुमारास स्थानिक गुन्हे अन्वेषण शाखेच्या पथकाने रानबांबुळी येथील अनावकरवाडी परिसरात सापळा रचला आणि संशयितांना रंगेहात पकडले.
आरोपींविरुद्ध भारतीय वन्यजीव संरक्षण अधिनियम १९७२ अंतर्गत कलम ९, ४४, ४९(ब), ५१ तसेच बी.एन.एस. (BNS) कलम ३(५) अन्वये सिंधुदुर्गनगरी पोलीस ठाण्यात गुन्हा दाखल करण्यात आला आहे.
पोलीस पथक:
ही कारवाई पोलीस अधीक्षक मोहन दहिकर, अप्पर पोलीस अधीक्षक नयोमी साटम यांच्या सूचनेनुसार पोलीस निरीक्षक प्रवीण कोल्हे यांच्या मार्गदर्शनाखाली करण्यात आली. यामध्ये पोलिस उपनिरीक्षक अनिल हडळ, सहाय्यक पोलिस उपनिरीक्षक सुरेश राठोड, हवालदार डॉमिनिक डिसोजा, राणे, जॅक्सन तसेच पोलीस कर्मचारी कांडर आणि समजिस्कर यांनी महत्त्वाची भूमिका बजावली.
वन्यजीवांची अवैध शिकार आणि तस्करी रोखण्यासाठी सिंधुदुर्ग पोलिसांनी उचललेले हे पाऊल अत्यंत महत्त्वपूर्ण मानले जात आहे. या रॅकेटमागे आणखी कोणाचे हात आहेत, याचा शोध घेण्यासाठी पोलिसांचा तपास सुरू आहे.
