लांजा (रत्नागिरी):
रत्नागिरी: जिल्ह्यातील लांजा तालुक्यातील वाकेड येथून ‘काळ आला होता पण वेळ आली नव्हती’ याचा प्रत्यय आणून देणारी एक अंगावर काटा आणणारी घटना समोर आली आहे. एका मानसिकदृष्ट्या अस्वस्थ व्यक्तीमुळे पेट्रोल पंपावरील तीन कर्मचाऱ्यांचे प्राण ऐनवेळी वाचले, मात्र दुर्दैवाने या घटनेत त्या अस्वस्थ व्यक्तीला आपला जीव गमवावा लागला. मुसळधार पाऊस सुरू असताना शनिवारी मध्यरात्रीनंतर हा निसर्गाचा चमत्कार आणि थरार वाकेड परिसरात घडला.
अचानक केबिनमध्ये घुसली व्यक्ती आणि…
शनिवारी रात्री सव्वा एक वाजण्याच्या सुमारास वाकेड येथील एका पेट्रोल पंपाच्या ऑफिस केबिनमध्ये मुसळधार पाऊस सुरू असताना, एक मानसिकदृष्ट्या अस्वस्थ असलेला नग्न इसम अचानक आत शिरला. मध्यरात्रीच्या वेळी अशा अनोळखी व्यक्तीला अचानक केबिनमध्ये आलेले पाहून तिथे कर्तव्यावर असलेले तिन्ही परप्रांतीय युवक प्रचंड घाबरले. जीवाच्या आकांताने त्यांनी तात्काळ केबिनमधून बाहेर पळ काढला.
अवघ्या काही सेकंदांत खेळ खलास!
ते युवक बाहेर पडताच, अवघ्या काही क्षणांत पाठीमागे मोठा आवाज झाला आणि पेट्रोल पंपाच्या त्या ऑफिस केबिनवर डोंगराची भलीमोठी दरड कोसळली. क्षणभरापूर्वी ज्या केबिनमध्ये हे युवक उभे होते, ती केबिन सेकंदाच्या आत मातीच्या ढिगाऱ्याखाली गाडली गेली. मृत्यू डोळ्यासमोरून गेल्याचे पाहून तिन्ही युवकांचा थरकाप उडाला. भीतीने गोंधळलेल्या अवस्थेत त्यांनी शेजारील नागरिकांकडे धाव घेत घडलेला प्रकार सांगितला. हे तिन्ही युवक बिहार राज्यातील असल्याची माहिती मिळाली आहे.
९ तासांच्या अथक प्रयत्नांनंतर मृतदेह बाहेर
केबिनमध्ये घुसलेला तो मानसिक अस्वस्थ इसम मात्र दुर्दैवाने वेळेत बाहेर पडू शकला नाही आणि तो दरडीखाली गाडला गेला. घटनेची माहिती मिळताच स्थानिक पोलीस, महसूल विभाग आणि राष्ट्रीय महामार्ग प्राधिकरणाची (NHAI) पथके तात्काळ घटनास्थळी दाखल झाली.
रात्रीपासूनच ४ जेसीबी, १ लोडर आणि पोकलेन मशीनच्या सहाय्याने युद्धपातळीवर ढिगारा उपसण्याचे काम सुरू करण्यात आले. तब्बल ९ तासांच्या अथक सर्च ऑपरेशननंतर रविवारी पहाटे साडेचार वाजण्याच्या सुमारास त्या अज्ञात व्यक्तीचा मृतदेह ढिगाऱ्याखालून बाहेर काढण्यात यश आले.
परिसरात एकच चर्चा…
केबिनमध्ये आलेल्या त्या अज्ञात व्यक्तीमुळे घाबरून या तरुणांनी तिथून पळ काढला आणि म्हणूनच त्यांचे प्राण वाचले. तो इसम या तिघांसाठी देवदूत ठरला, परंतु स्वतः मात्र काळाच्या पडद्याआड गेला. ‘दैव बलवत्तर म्हणूनच हे तरुण वाचले’ अशीच चर्चा आता संपूर्ण लांजा तालुक्यात रंगली आहे.
