Follow us on 
मुंबई: मुंबईत तबेला किंवा शेतकरी पुरवठा करणाऱ्या दुधाच्या किमतीत मोठी वाढ होणारआहे. बॉम्बे मिल्क प्रोड्यूसर्स असोसिएशनने घाऊक दर प्रति लिटर ९३ रुपयांवरून १०२ रुपये करण्याचा निर्णय घेतला आहे. हा नवीन दर १ सप्टेंबर २०२६ पासून लागू होईल आणि तो फेब्रुवारी २०२७ अखेरपर्यंत कायम राहील.
वाढत्या पशुखाद्याच्या किमती आणि जनावरांच्या देखभालीच्या खर्चात झालेल्या वाढीमुळे हा निर्णय घेण्यात आला आहे. धान्य, तूर चुनी, चणा चुनी यांसारख्या खाद्यपदार्थांच्या किमतीत सुमारे २५ टक्क्यांपर्यंत वाढ झाली आहे. तेलबिया आणि इतर निविष्ठांच्या दरातही वाढ झाल्याने दूध उत्पादकांना सध्याच्या दरात उत्पादन सुरू ठेवणे कठीण झाले होते. या वाढीमुळे थेट शेतकऱ्यांकडून किंवा तबेलातून दूध घेणाऱ्या ग्राहकांना किरकोळ पातळीवर सुमारे ११० रुपये प्रति लिटरपर्यंत मोजावे लागू शकते. सध्याची किरकोळ किंमत सुमारे १०० रुपये प्रति लिटरच्या आसपास आहे.
ही वाढ सणासुदीच्या काळाच्या आधीच आली असल्याने घराघरांत दुधाच्या खर्चात वाढ होण्याची शक्यता आहे. असोसिएशनच्या अध्यक्षांनी सांगितले की, अलीकडच्या काळातील ही सर्वात मोठी एकरकमी वाढ आहे. उत्पादकांना दिलासा मिळावा आणि उत्पादन खर्च भरून निघावा यासाठी हा निर्णय घेण्यात आला.
यापूर्वी गोकुळ सारख्या सहकारी संघटनेनेही काही प्रमाणात दरवाढ केली होती, पण तबेला दुधाची वाढ वेगळी आहे. ग्राहकांना चहा, मिठाई, दही, पनीर आणि इतर दुग्धजन्य पदार्थांच्या किमतीतही परिणाम जाणवू शकतो. दूध उत्पादक आणि पुरवठादार या वाढीमुळे थोडा दिलासा मिळेल अशी अपेक्षा आहे, तर मुंबईतील सामान्य ग्राहकांसाठी दैनंदिन खर्चात आणखी वाढ होणार आहे.
