नांदेड:
नांदेड-पुणे एक्स्प्रेस हडपसरऐवजी पूर्ववत पुणे शहरातील मुख्य रेल्वे स्थानकापर्यंत चालवावी आणि आगामी काळात सुरू होणारी मुंबई-हैदराबाद ‘वंदे भारत स्लिपर’ रेल्वे पुणे-सोलापूरऐवजी मनमाड, छत्रपती संभाजीनगर, नांदेड या मराठवाडा मार्गावरून चालवावी, अशी आग्रही मागणी माजी मुख्यमंत्री व खासदार अशोकराव चव्हाण यांनी केली आहे. दक्षिण मध्य रेल्वेने आयोजित केलेल्या नांदेड विभागातील खासदारांच्या बैठकीत ते बोलत होते. हडपसर स्थानक प्रवाशांसाठी अत्यंत गैरसोयीचे असून, गाडी पहाटे तिथे पोहोचत असल्याने पुणे शहरात जाण्यासाठी प्रवाशांचे मोठे हाल होतात, याकडे त्यांनी रेल्वे प्रशासनाचे लक्ष वेधले.
या बैठकीत खासदार चव्हाण यांनी मराठवाड्यातील पायाभूत सुविधा, प्रवाशांची सुरक्षा आणि शेतकरी-व्यापाऱ्यांच्या विविध प्रश्नांवर जोरदार आवाज उठवला. मुंबई-हैदराबाद वंदे भारत स्लिपर मराठवाड्यातून नेल्यास उत्तर महाराष्ट्र आणि मराठवाडा या दोन्ही विभागांना प्रीमियम रेल्वे सेवा मिळेल, असा महत्त्वाचा प्रस्ताव त्यांनी मांडला. यासोबतच, लातूर-दौंड मार्गे नांदेड-पुणे वंदे भारत एक्सप्रेस ही नवीन रेल्वे आणि नांदेड-छत्रपती संभाजीनगर पॅसेंजर ट्रेन पूर्ववत सुरू करण्याची मागणीही त्यांनी केली. नांदेड-लातूर, नांदेड-बिदर आणि बोधन-मुखेड-लातूर या रेल्वे मार्गांच्या कामांना रेल्वेने पहिली प्राथमिकता द्यावी, असे सांगतानाच बिदर प्रकल्पासाठी कर्नाटक सरकारशी चर्चा करून मार्ग काढणार असल्याचे त्यांनी स्पष्ट केले.
व्यापारी आणि शेतकऱ्यांच्या दृष्टीने मुदखेड येथील फुल उत्पादकांसाठी माल चढवण्या-उतरवण्यासाठी पुरेसा वेळ आणि थांबे देण्याची मागणी त्यांनी केली. तसेच, खतांच्या वाहतुकीसाठी जिल्हाधिकाऱ्यांशी समन्वय साधून नांदेड जिल्ह्यात ३-४ ठिकाणे निश्चित करण्याची सूचना केली. रेल्वेचे उड्डाणपूल आणि सदोष भुयारी मार्गांमुळे साचणाऱ्या पाण्याच्या समस्येकडे त्यांनी फोटोंसह लक्ष वेधले आणि तिथे फूट ओव्हर ब्रिज अनिवार्य करण्याची मागणी केली. याशिवाय, ‘वन डिस्ट्रिक्ट, वन डिव्हिजन’ धोरण राबवून महाराष्ट्राच्या हद्दीतील सर्व स्थानके नांदेड डिव्हिजनमध्येच ठेवावीत, अशी भूमिका त्यांनी मांडली. या बैठकीला खासदार नागेश पाटील आष्टीकर, रवींद्र चव्हाण, डॉ. अजित गोपछडे, बंडू जाधव यांच्यासह रेल्वेचे वरिष्ठ अधिकारी उपस्थित होते.
