महाराष्ट्र राज्य मार्ग परिवहन महामंडळाने एसटी प्रवाशांच्या सोयीसाठी एक अत्यंत महत्त्वाचा आणि दिलासादायक निर्णय घेतला आहे. महामंडळाची अत्यंत लोकप्रिय आणि सर्वाधिक पसंती मिळवणारी ‘आवडेल तेथे कोठेही प्रवास’ ही सवलत योजना आता पूर्णपणे डिजिटल करण्यात आली आहे. या योजनेअंतर्गत दिले जाणारे पास आता प्रवाशांना थेट ऑनलाइन पद्धतीने उपलब्ध करून दिले जात आहेत. त्यामुळे आता पास मिळवण्यासाठी एसटी आगारात जाऊन तासन्‌तास रांगेत उभे राहण्याचा त्रास प्रवाशांना सहन करावा लागणार नाही.
एसटी महामंडळाच्या परिवहन विभागाने २९ सप्टेंबर २०२६ रोजी काढलेल्या परिपत्रकानुसार ही नवीन डिजिटल सुविधा अमलात आणली आहे. याअंतर्गत ४ दिवस आणि ७ दिवसांच्या कालावधीसाठी असणारे प्रवास पास प्रवाशांना घरबसल्या काढता येतील. यासाठी महामंडळाचे अधिकृत संकेतस्थळ तसेच मोबाईल ॲप्लिकेशन वापरता येईल. ऑनलाइन बुकिंग केल्यानंतर मिळणारा पास प्रवासी आपल्या मोबाईलमध्ये पीडीएफ स्वरूपात किंवा प्रिंट काढून दाखवू शकतात. या पासवर एक विशेष क्यूआर कोड असेल, ज्याची तपासणी प्रवासादरम्यान वाहक किंवा तपासणी अधिकारी क्यूआर कोड स्कॅन करून करतील.
महामंडळाने या योजनेसाठीचे सुधारित दर १ ऑगस्टपासून लागू केले असून ते बसच्या प्रकारानुसार निश्चित करण्यात आले आहेत. या नव्या रचनेनुसार साधारण, एक्सप्रेस, रात्रं-दिवस सेवा आणि शहर बस प्रवासासाठी ७ दिवसांचा पास प्रौढांसाठी २,७७५ रुपये तर ५ ते १२ वर्षांपर्यंतच्या मुलांसाठी १,३९० रुपये असेल. याच बस प्रकारासाठी ४ दिवसांचा पास हवा असल्यास प्रौढांसाठी १,५९० रुपये आणि लहान मुलांसाठी ८०० रुपये दर ठरवण्यात आला आहे.
आरामदायी प्रवासासाठी ओळखल्या जाणाऱ्या शिवशाही बससाठी (आसन व्यवस्था आणि आंतरराज्य प्रवासासह) नवीन दर लागू झाले आहेत. शिवशाही बसच्या ७ दिवसांच्या पाससाठी प्रौढ प्रवाशाला ३,१८० रुपये आणि लहान मुलांसाठी १,५९५ रुपये मोजावे लागतील. तर ४ दिवसांच्या प्रवासासाठी प्रौढांना १,८२५ रुपये आणि मुलांसाठी ९१५ रुपये शुल्क निश्चित करण्यात आले आहे.
पर्यावरणपूरक अशा १२ मिटरच्या ई-बस ‘शिवाई’साठीही या योजनेचे वेगळे दरपत्रक जाहीर करण्यात आले आहे. शिवाई बसमधून ७ दिवसांच्या अमर्याद प्रवासासाठी प्रौढ प्रवाशांना ३,६२५ रुपये आणि लहान मुलांना १,८१५ रुपये द्यावे लागतील. तसेच ४ दिवसांच्या पाससाठी प्रौढांना २,०७५ रुपये तर लहान मुलांसाठी १,०४५ रुपये दर ठेवण्यात आला असून, डिजिटल सुविधेमुळे सर्वसामान्य प्रवाशांचा वेळ आणि श्रम दोन्ही वाचणार आहेत.
